പിണക്കം തീര്‍ന്നു; യുഎസില്‍ നിന്ന് വിജയ് നേരെ എത്തിയത് ആശുപത്രിയിലുള്ള അച്ഛനെ കാണാന്‍

വിജയും അച്ഛനും തമ്മിൽ ചില അസ്വാരസ്യങ്ങളുണ്ടെന്ന് നേരത്തെ റിപ്പോർട്ടുകൾ വന്നിരുന്നു. ഇപ്പോഴിതാ താരം തന്റെ അച്ഛൻ എസ്.എ. ചന്ദ്രശേഖറിനും അമ്മ ശോഭയ്ക്കുമൊപ്പമുള്ള പുതിയ ചിത്രമാണ് സമൂഹമാധ്യമങ്ങളിൽ ചർച്ചയാക്കുന്നത്. ചന്ദ്രശേഖർ തന്നെയാണ് ഈ ചിത്രം സമൂഹമാധ്യമങ്ങളിലൂെട പങ്കുവച്ചത്.

അച്ഛൻ എസ്.എ. ചന്ദ്രശേഖറിനും അമ്മ ശോഭയ്ക്കുമൊപ്പമുള്ള വിജയുടെ പുതിയ ചിത്രം

സൂപ്പർതാരം വിജയ്‌യും അച്ഛ‌ൻ എസ്എ ചന്ദ്രശേഖറും തമ്മിൽ അത്ര അടുപ്പത്തിൽ അല്ലെന്ന് അഭ്യൂഹങ്ങൾ പരക്കാൻ തുടങ്ങിയിട്ട് നാളുകൾ ഏറെയായി. വിജയ്‌യുടെ കാര്യത്തിൽ അച്ഛൻ അനാവശ്യമായി ഇടപെടുന്നതാണ് പ്രശ്നങ്ങൾക്ക് കാരണമായത്. താരത്തിന്റെ രാഷ്ട്രീയ പ്രവേശനവുമായി ബന്ധപ്പെട്ടുള്ള ചന്ദ്രശേഖറിന്റെ നിലപാടുകൾ വിവാദങ്ങൾക്ക് കാരണമാകാറുണ്ട്. ഇത് അച്ഛനും മകനും തമ്മിലുള്ള ബന്ധത്തിന് വിള്ളൻ വീഴ്ത്തി എന്നാണ് റിപ്പോർട്ടുകൾ.

ഇപ്പോൾ എല്ലാ അഭ്യൂഹങ്ങൾക്ക് അന്ത്യം കുറിച്ചുകൊണ്ട് അച്ഛനും അമ്മയ്ക്കുമൊപ്പമുള്ള വിജയ്‌യുടെ ചിത്രമാണ് പുറത്തുവന്നത്. ഹൃദയസംബന്ധമായ അസുഖത്തെ തുടര്‍ന്നുണ്ടായ ശസ്ത്രക്രിയയ്ക്കു ശേഷം വിശ്രമത്തില്‍ കഴിയുന്ന അച്ഛനെ കാണാനായാണ് താരം എത്തിയത്. ചന്ദ്രശേഖർ തന്നെയാണ് ഈ ചിത്രം സമൂഹമാധ്യമങ്ങളിലൂെട പങ്കുവച്ചത്. ‘കുടുംബബന്ധങ്ങളും വാത്സല്യവുമാണ് മനുഷ്യമനസ്സിന്റെ ഏറ്റവും വലിയ ഔഷധം.’- എന്ന അടിക്കുറിപ്പിലാണ് ചിത്രം പോസ്റ്റ് ചെയ്തത്.

ലിയോ ഷൂട്ടിങ് പൂർത്തിയാക്കിയതിന് പിന്നാലെ യുഎസ് സന്ദർശനത്തിലായിരുന്നു താരം. അച്ഛൻ ആശുപത്രിയിൽ പ്രവേശിപ്പിച്ചത് അറിഞ്ഞ് തന്റെ യാത്ര വെട്ടിക്കുറച്ചാണ് വിജയ് ചെന്നൈയിലേക്ക് തിരിച്ചെത്തിയത്. ആശുപത്രിയിൽ പോയാണ് താരം അച്ഛനേയും അമ്മ ശോഭയേയും കണ്ടത്. ലോകേഷ് ഒരുക്കുന്ന ലിയോയ്ക്ക് ശേഭം വെങ്കട് പ്രഭുവിനൊപ്പമാകും താരം ഒന്നിക്കുക. ചിത്രത്തിന്റെ പ്രഖ്യാപനത്തിനായി കാത്തിരിക്കുകയാണ് ആരാധകർ.