നിയമന കോഴക്കേസ്: അഖിലിന്റെ പരാതി അന്വേഷിക്കുന്ന കന്റോൺമെന്റ് പൊലീസ് ഹരിദാസന്റെ വീട്ടിൽ

മലപ്പുറം: വിവാദമായ നിയമന കോഴക്കേസിൽ ആരോഗ്യമന്ത്രിയുടെ പേഴ്സണൽ സ്റ്റാഫംഗം അഖിൽ മാത്യുവിന്റെ പരാതി അന്വേഷിക്കുന്ന കന്റോൺമെന്റ് പൊലീസ് ആരോപണം ഉന്നയിച്ച ഹരിദാസന്റെ വീട്ടിലെത്തി. അഖിലിന്റെ പരാതിയിൽ ഹരിദാസന്റെ മൊഴിയെടുക്കുന്നതിനായാണ് പൊലീസ് സംഘം എത്തിയത്. കന്റോൺമെന്റ് പൊലീസ് സിഐയും മറ്റൊരു പൊലീസുകാരനുമാണ് ഹരിദാസനിൽ നിന്ന് മൊഴിയെടുക്കുന്നത്.

അഖിൽ മാത്യുവിന് ഒരു ലക്ഷവും ഇടനിലക്കാരനായ സിഐടിയു പത്തനംതിട്ട മുൻ ഓഫീസ് സെക്രട്ടറി അഖിൽ സജീവിന് 75,000 രൂപയും കൈമാറിയെന്നാണ് മലപ്പുറം സ്വദേശി ഹരിദാസൻ്റെ ആരോപണം. ഇതിന് പിന്നാലെയാണ് അഖിൽ മാത്യു പൊലീസില്‍ പരാതി നല്‍കിയത്. തന്റെ പേരുപയോഗിച്ച് തന്നെയും ആരോഗ്യവകുപ്പ് മന്ത്രിയെയും അപകീർത്തിപ്പെടുത്താൻ ലക്ഷ്യമിട്ട് ഹരിദാസനിൽ നിന്നും മറ്റാരോ പണം കൈപ്പറ്റിയെന്നും ഈ സംഭവത്തിൽ വിശദമായ അന്വേഷണം നടത്തണമെന്നുമായിരുന്നു അഖിലിന്റെ പരാതി.