കർണാടക- തമിഴ്‌നാട് അതിർത്തിയിലെ ഹൊസൂറിനും അത്തിബലെക്കുമിടയിൽ ദേശീയപാതയോരത്ത് സ്ഥിതിചെയ്യുന്ന പടക്ക കടകൾക്കുമുന്നിലാണ് അപകടമുണ്ടായത്. പടക്ക കടഉടമ കണ്ടൈയ്നർ ലോറിയിൽ വന്ന പടക്കങ്ങൾ ഇറക്കവേയാണ് പൊട്ടിത്തെറിയുണ്ടായത്. തീപ്പൊരി കടയിലേക്ക് വീണതോടെ ശേഖരിച്ചുവച്ച പടക്കങ്ങൾ കൂട്ടത്തോടെ പൊട്ടുകയായിരുന്നു. തുടർന്ന് തൊട്ടടുത്ത കടകളിലേക്കും തീ വ്യാപിച്ചു. കണ്ടെയ്നർ ലോറിയും ഭാഗികമായി കത്തിനശിച്ചു.

സംഭവം നടക്കുമ്പോൾ പടക്കക്കടകളിൽ ജീവനക്കാരും അല്ലാത്തവരുമായി ഇരുപത്തി മൂന്നോളം പേരുണ്ടായിരുന്നു. 12 പേർ അപകടത്തിൽ മരിച്ചു. അഞ്ച് പേരെ രക്ഷപ്പെടുത്താനായി. കടയുടെ അകത്തും., ചേർന്നുള്ള ഗോഡൗണിലും ജോലി ചെയ്തിരുന്നവർ പുറത്തു കടക്കാനാവാതെ ദുരന്തത്തിനിരയയി എന്നാണ് റിപ്പോർട്ട്. അഗ്നിശമനസേന മണിക്കൂറുകളോളം ശ്രമിച്ചാണ് തീ നിയന്ത്രണ വിധേയമാക്കിയത്.

തീ പൂർണമായും അണഞ്ഞാൽ മാത്രമേ പരിശോധന നടത്തി മരണസംഖ്യ സംബന്ധിച്ച ഔദ്യോഗിക വിവരം പുറത്തുവിടാനാകൂയെന്ന് പോലീസ് അറിയിച്ചു. പരുക്കേറ്റവരെ ബെംഗളൂരുവിലെ ആശുപത്രിയിലേക്ക് മാറ്റി. ഇവരിൽ ചിലരുടെ നിലരുടെ ഗുരുതരമാണ്.

പൊട്ടിത്തെറിയെത്തുടർന്ന് അന്തരീക്ഷത്തിൽ കറുത്ത പുകച്ചുരുളുകൾ രൂപപ്പെട്ടതോടെ മണിക്കൂറുകളോളം ബംഗളുരു – ചെന്നൈ ദേശീയ പാതയിൽ ഗതാഗതം തടസപ്പെട്ടു. ദീപാവലി ആഘോഷങ്ങൾക്കായി പടക്കങ്ങൾ വിൽക്കാൻ നിരവധി താത്കാലിക കടകളാണ് കർണാടക – തമിഴ്‌നാട് അതിർത്തി ഗ്രാമമങ്ങളിൽ പ്രവർത്തിക്കുന്നത്. മുൻകരുതൽ നടപടികൾ സ്വീകരിക്കാതെയും അനുവദനീയമായതിലും അധികം പടക്കങ്ങൾ ശേഖരിക്കുന്നതും മൂലം അപകടങ്ങൾ ക്ഷണിച്ചുവരുത്തന്നത് പതിവാണ്.