അസമയത്തെ വെടിക്കെട്ട് തടഞ്ഞ് ഹൈക്കോടതി; ദൈവത്തെ പ്രീതിപ്പെടുത്താൻ വെടിക്കെട്ട് വേണമെന്നില്ലെന്നും കോടതി

ആരാധനാലയങ്ങളില്‍ അസമയത്തുള്ള വെടിക്കെട്ട് തടഞ്ഞ് ഹൈക്കോടതി. വെടിക്കെട്ട് ശബ്ദ-പരിസ്ഥിതി മലിനീകരണങ്ങള്‍ക്ക് കാരണമാകുന്നുവെന്നു ചൂണ്ടിക്കാട്ടിയാണ് ജസ്റ്റിസ് അമിത് റാവലിന്റെ ഉത്തരവ്. അസമയങ്ങളില്‍ ആരാധനാലയങ്ങളില്‍ വെടിക്കെട്ട് നടക്കുന്നില്ലെന്ന് അതത് ജില്ലാ കളക്ടര്‍മാര്‍ ഉറപ്പ് വരുത്തണമെന്നും ജില്ലാ പോലീസ് മേധാവിയുടെ നേതൃത്വത്തില്‍ ആരാധനാലയങ്ങളില്‍ പരിശോധന നടത്തി അനധികൃതമായി സൂക്ഷിച്ചിട്ടുള്ള പടക്കസാമഗ്രികള്‍ പിടിച്ചെടുക്കണമെന്നും കോടതി ഉത്തരവിട്ടു. എറണാകുളം മരട് ക്ഷേത്രത്തില്‍ വെടിക്കെട്ട് നിരോധിക്കണമെന്ന് ആവശ്യപ്പെട്ടുള്ള ഹര്‍ജിയിലാാണ് ഹൈക്കോടതിയുടെ ഉത്തരവ്. ഉത്തരവ് പാലിച്ചില്ലെങ്കില്‍ കോടതിയലക്ഷ്യ നടപടി സ്വീകരിക്കുമെന്നും ജസ്റ്റിസ് അമിത് റാവല്‍ മുന്നറിയിപ്പ് നല്‍കി.

രാത്രികാല വെടിക്കെട്ട് പൊതുജനങ്ങളുടെ സമാധാനത്തിന് ഭംഗമുണ്ടാക്കുമെന്ന് നിരീക്ഷിച്ച കോടതി ദൈവപ്രീതിക്ക് വെടിക്കെട്ട് വേണമെന്ന് ഒരു വിശുദ്ധ പുസ്തകത്തിലും പറയുന്നില്ലെന്നും ചൂണ്ടിക്കാട്ടി. കടുത്ത ശബ്ദ-പരിസ്ഥിതി മലിനീകരണമാണ് വെടിക്കെട്ട് മൂലമുണ്ടാകുന്നതെന്ന് കോടതി നേരിട്ട് മനസിലാക്കിയതാണെന്നും ജസ്റ്റിസ് റാവല്‍ വ്യക്തമാക്കി. വിഷയം സംബന്ധിച്ച് സംസ്ഥാന സര്‍ക്കാര്‍ മൂന്നാഴ്ചയ്ക്കകം റിപ്പോര്‍ട്ട് സമര്‍പ്പിക്കണമെന്നും കോടതി ആവശ്യപ്പെട്ടിട്ടുണ്ട്.