By Newskeralalive 
തിരുവനന്തപുരം: ജില്ലാ, സിറ്റി പൊലീസ് മേധാവിമാരെ സ്ഥലംമാറ്റി. ഡിഐജിയും കോഴിക്കോട് സിറ്റി പൊലീസ് കമ്മീഷണറുമായ രാജ്പാല്‍ മീണയെ കണ്ണൂര്‍ റേഞ്ച് ഡിഐജി എന്ന തസ്തിക സൃഷ്ടിച്ച് ആ ചുമതലയിലേക്ക് മാറ്റി. വയനാട് ജില്ലാ പൊലീസ് മേധാവിയായ 2011 ബാച്ച് ഐപിഎസ് ഉദ്യോഗസ്ഥന്‍ ടി നാരായണനാണ് പകരം കോഴിക്കോട് പൊലീസ് കമ്മീഷണറായി എത്തുക.
കോഴിക്കോട് റൂറല്‍ ജില്ലാ പൊലീസ് മേധാവി അരവിന്ദ് സുകുമാറിനെ പുതിയതായി രൂപീകരിച്ച എക്കണോമിക് ഒഫന്‍സ് വിങ്ങിന്റെ തിരുവനന്തപുരം റേഞ്ചിലേക്കാണ് മാറ്റിയത്. കാഫിര്‍ സ്‌ക്രീന്‍ ഷോട്ടുമായി ബന്ധപ്പെട്ട കേസിന്റെ അന്വേഷണ മേല്‍നോട്ടം വഹിച്ച ഉദ്യോഗസ്ഥനാണ് അരവിന്ദ് സുകുമാര്‍.
കോട്ടയം ജില്ലാ പോലീസ് മേധാവി കെ കാര്‍ത്തിക്കിനെ വിജിലന്‍സിലേക്ക് മാറ്റി. എസ് പി തസ്തിക എക്സ് കേഡര്‍ ആയി സൃഷ്ടിച്ചാണ് സ്ഥലംമാറ്റം. ആലപ്പുഴ ജില്ലാ പൊലീസ് മേധാവി ചൈത്ര തെരേസ ജോണ്‍ കൊല്ലം സിറ്റി പൊലീസ് കമ്മീഷണറാകും. നിലവിലെ കമ്മീഷണര്‍ കൊല്ലം സിറ്റി പൊലീസ് കമ്മീഷണർ വിവേക് കുമാര്‍ സ്ഥലം മാറിപ്പോയ ഒഴിവിലേക്കാണ് ചൈത്രയെ നിയമിച്ചത്.
എറണാകുളം ഭീകരവിരുദ്ധ സ്‌ക്വാഡ് എസ് പി ആയ എസ് സുജിത് ദാസ് പത്തനംതിട്ട ജില്ലാ പൊലീസ് മേധാവി ആകും. സുജിത്തിന് പകരം സ്‌ക്വാഡിലേക്ക് സ്പെഷ്യല്‍ ബ്രാഞ്ച് എസ് പി ആയ എം എല്‍ സുനില്‍ എത്തും.
മലബാര്‍ സ്പെഷ്യല്‍ പൊലീസ് കമാന്‍ഡന്റ് കെ വി സന്തോഷിനെ എക്സൈസ് വിജിലന്‍സിലേക്ക് ഡെപ്യൂട്ടേഷന്‍ നല്‍കി മാറ്റി. പൊലീസ് ട്രെയിനിങ് കോളേജിലെ പ്രിന്‍സിപ്പലായ വി യു കുര്യാക്കോസിനെ എറണാകുളം ക്രൈംബ്രാഞ്ച് എസ് പിയായി നിയമിച്ചു.