സ്കൂൾ പാർലമെൻറ് തെരഞ്ഞെടുപ്പ് നടപടികൾ ചോദ്യം ചെയ്ത് യുഡിഎസ്എഫ് ഹൈകോടതിയിലേക്ക്

പട്ടാമ്പി മാരായമംഗലം ഗവൺമെൻറ് ഹയർ  സെക്കണ്ടറി സ്കൂൾ പാർലമെൻറ് തെരഞ്ഞെടുപ്പ് നടപടി ക്രമങ്ങൾ ചോദ്യം ചെയ്ത് ഹൈക്കോടതിയെ സമീപിക്കാൻ ഒരുങ്ങുകയാണ് യുഡിഎസ്എഫ്.

ഇന്നലെ നടന്ന തെരഞ്ഞെടുപ്പ് ഫലം അട്ടിമറിക്കാൻ എസ് എഫ് ഐ – ഡി വൈ എഫ് ഐ സംഘം ശ്രമിച്ചിരുന്നു. 24 ൽ 14 സീറ്റുകളിൽ യുഡിഎസ്എഫ് സംഘം വിജയിക്കുകയും സ്കൂൾ ലീഡർ, ചെയർമാൻ സീറ്റുകളിലേക്ക് വിജയം ഉറപ്പിക്കുകയും ചെയ്തിരുന്നു. എന്നാൽ വിജയിച്ച 2 യുഡിഎസ്എഫ് പ്രതിനിധികളായ വിദ്യാർത്ഥിനികളെ എസ് എഫ് ഐ – ഡി വൈ എഫ് ഐ സംഘം ഇതിനിടെ സ്കൂളിൽ നിന്നും ബലമായി കടത്തികൊണ്ട് പോവുകയും ഭീഷണിപ്പെടുത്തുകയും ചെയ്തതായി യുഡിഎസ്എഫ് ആരോപിക്കുന്നു. ഇത് തടയുന്നതിനിടെ യുഡിഎസ്എഫ്- നേതാക്കളേയും രക്ഷിതാക്കളേയും  എസ് എഫ് ഐ – ഡി വൈ എഫ് ഐ സംഘം മർദ്ദിച്ചതായും ആരോപണമുണ്ട്.

പിന്നാലെ പോലീസ് എത്തിയെങ്കിലും വിദ്യാർത്ഥിനികളെ വിട്ടുനൽകാൻ എസ് എഫ് ഐ – ഡി വൈ എഫ് ഐ സംഘം തയ്യാറായില്ലെന്നും അവർ പറഞ്ഞു. അതിനിടെ പരാജയഭീതി പൂണ്ട എസ് എഫ് ഐ 5 C ക്ലാസിലെ വനിതാ സംവരണത്തിൽ ആൺകുട്ടി നാമനിർദ്ദേശ പത്രിക നൽകിയത് ചുണ്ടിക്കാട്ടി തെരഞെടുപ്പ് ഫലം അട്ടിമറിക്കാൻ ശ്രമം ആരംഭിച്ചു.  എസ് എഫ് ഐ പ്രിൻസിപ്പാളിന് പരാതി നൽകിയതോടെ സ്കൂൾ ലീഡർ – ചെയർമാൻ തെരഞ്ഞെടുപ്പ് മാറ്റിവച്ചു.

ആൺകുട്ടിയുടെ പത്രിക തള്ളുകയും പെൺകുട്ടി എതിരില്ലാതെ തെരഞ്ഞെടുക്കപ്പെടുകയും ചെയ്ത 5C ക്ലാസിലെ വിജയം അംഗീകരിക്കണമെന്നും തെരഞ്ഞെടുപ്പ് നടപടികൾ തുടരണമെന്നും ആവശ്യപ്പെട്ട് യുഡിഎസ്എഫ് പ്രിൻസിപ്പാളിന് കത്ത് നൽകിയെങ്കിലും പ്രിൻസിപ്പാൾ എസ് ഫ് ഐ- ഭീഷണിക്ക് വഴങ്ങുകയായിരുന്നുവെന്നും യുഡിഎസ്എഫ് ചൂണ്ടിക്കാട്ടി. സംഭവത്തിൽ- യുഡിഎസ്എഫ് ജില്ലാ വിദ്യാഭ്യാസ വകുപ്പിന് പരാതി നൽകും. കൂടാതെ ഹൈകോടതിയെ സമീപിക്കാനാണ് യുഡിഎസ്എഫ്- നീക്കം.